- A xornada organizada polo Paquete de Traballo 11 reuniu expertos en acuicultura e transferencia para estruturar estratexias de valorización dos resultados da investigación
O Paquete de traballo 11 do Programa de Ciencias Mariñas de Galicia organizou unha xornada no Centro Tecnolóxico do Mar – Fundación CETMAR para analizar e planificar a transferencia de coñecemento dos resultados acadados en investigación sobre acuicultura sostible. O obxectivo desta iniciativa foi desenvolver estratexias e protocolos que axilicen e sistematicen o impacto do coñecemento xerado, garantindo a súa aplicación efectiva polos usuarios finais.
No marco do programa, o Paquete de Traballo 11, “Cultura científica, transferencia e capacitación como ferramentas de transformación social para o desenvolvemento sostible”, levou a cabo unha identificación e caracterización das unidades de coñecemento con potencial transferible, co fin de facilitar a transición dos resultados científicos cara a aplicacións prácticas de interese para a sociedade. Este esforzo busca que os avances acadados na investigación repercutan de forma efectiva en ámbitos como a educación, a economía e a gobernanza.
Durante a primeira parte do encontro, os asistentes analizaron a organización dos resultados identificados no Programa e exploraron novas posibilidades de agrupamento en clústeres, atendendo a áreas como o benestar animal, o cultivo larval en bivalvos, a acuicultura multitrófica, xestión pesqueira, as patoloxías na piscicultura e as ferramentas de mellora xenética, entre outras. Posteriormente, en dúas mesas de traballo, definiron o impacto potencial dos resultados, identificaron os axentes involucrados e estableceron prazos concretos para a súa implementación.
Os participantes avaliaron ademais o potencial de transferencia dos resultados en base a diversos factores clave, como a relación cos potenciais usuarios, a madurez tecnolóxica, a capacidade de resolución de desafíos, os custos e as barreiras existentes. Tamén se abordaron aspectos transformadores, como o potencial para xerar cambios estruturais ou nos valores, a equidade social e a sustentabilidade ecolóxica.
Para pechar a sesión, estableceuse unha folla de ruta de transferencia aplicada a un caso concreto, así como accións futuras para fortalecer a aplicación dos resultados acadados. Con esta iniciativa, o Programa de Ciencias Mariñas de Galicia reforza o seu compromiso coa valorización do coñecemento e o seu impacto real na sociedade.
